BÀNARI. Acumpridu su murale in onore de Juanne Maria Angioy e de su 28 de abrile de su 1794. Custu mangianu sos pitzocos de s'iscola mèdia, ghiados dae s'artista "Super" e dae Carla Porcheddu e Maria Vitòria Porcu, ant disinnadu e coloradu unu chirru de s'anfiteatreddu postu a palas de sa Ludoteca comunale pro mèdiu de tanta passione e unas cantas bomboleddas de vernitze. A pustis de àere seberadu unu de sos disignos fatos in sos pabiros sàbadu coladu, "Super" at mustradu a sos pitzinnos sas tècnicas netzessàrias pro àere un'òpera galana e bene fata, partende dae s'impreu de sos colores prus craros pro arribare, in fines, a una bona definitzione de sos inghìrios. Su murale, finidu a borta de die, mustrat a maduru sa data in ue ruet "Sa Die de sa Sardigna", sa cara de su rivolutzionàriu bonesu, e cantos de s'innu antifeudale iscritu dae Frantziscu Ignàtziu Mannu. Sàbadu chi benit su traballu at a èssere presentadu in su Palatu Solinas.