TIESI. Chenàbura su 27 una pratza in carrera de Garau at a èssere intitulada a Giampiero Tanca, finantzieri tiesinu nàschidu su 23 de làmpadas de su 1949 e mortu su 7 de nadale de su 1970 a segus de un'intzidente istradale. Tanca traballaiat in su corpu prepostu a sa vigilàntzia doganale. A su chi nos contat Salvatore Pittalis, presidente de s'Anfi Meilogu (sa setzione locale de s'assòtziu de sos finantzieris), Tanca «est mortu a segus de s'intzidente àpidu in sa provintziale Gironico-Olgiate Comasco, in fatu de una vetura suspeta». Sa tzerimònia at a comintzare in sa crèsia de Santa Vitòria dae sas 10. A sa missa ant a èssere presentes s'archipìscamu de Tàtari Paolo Atzei, su capellanu militare e don Tore Ruzzu. A pustis de sa missa sas autoridades e sos chi ant a leare parte a sa tzerimònia ant a mòvere conca a “Piazza Tanca”.